“Цэцэнс Майнинг энд Энержи” ХХК-ийн шат дараатайгаар амжилттай хэрэгжүүлж буй 600 МВт хүчин чадалтай Бөөрөлжүүт цахилгаан станц, уурхайн цогц төсөл нь Монгол Улсын эрчим хүчний салбарт сүүлийн 40 жилийн хугацаанд хэрэгжсэн үндэсний хөрөнгө оруулалттай хамгийн том бүтээн байгуулалт юм.

2024–2025 онуудад Бөөрөлжүүт цахилгаан станцын эхний хоёр блок буюу нийт 300 МВт хүчин чадлыг ашиглалтад оруулснаар Төвийн бүсийн эрчим хүчний системийн найдвартай ажиллагаа мэдэгдэхүйц сайжирч, оргил ачааллын үеийн хязгаарлалтыг бууруулахад бодит хувь нэмэр орууллаа. Ингэснээр Төвийн бүсийн нэгдсэн сүлжээнд 2025 онд 1 тэрбум кВт.цаг эрчим хүч нийлүүлж, нийт хэрэглээний 15 орчим хувийг ханган ажилласан бөгөөд цаашид Монгол Улсын эрчим хүчний нийт хэрэглээний 20–25 хувийг хангах зорилт тавин ажиллаж байна.

Монгол Улсын эрчим хүчний системийн хоёр дахь том эх үүсвэр Бөөрөлжүүт цахилгаан станц 2027–2028 онд 3, 4-р блокоо бүрэн ашиглалтад оруулснаар эрчим хүчний аюулгүй байдал, найдвартай хангамжийг улам баталгаажуулж, улсын эдийн засгийн өрсөлдөх чадварыг шинэ шатанд гаргана гэдэгт бид итгэлтэй байна.

Цогц төсөл нь зөвхөн цахилгаан станц, уурхайгаар хязгаарлагдахгүй, дагалдах дэд бүтэц, сэргээгдэх эрчим хүч, ложистик, нүүрс-химийн боловсруулах үйлдвэрийн шийдэл бүхий эрчим хүчний шинэ экосистемийг бүрдүүлсэн, стратегийн ач холбогдолтой иж бүрэн бүтээн байгуулалт юм.

Бид үндэсний үйлдвэрлэл, эрчим хүчний бие даасан байдлыг бэхжүүлж, эдийн засгийн тогтвортой өсөлтийг дэмжих зорилгоор хөрөнгө оруулагч, түншүүдтэй хамтран ирээдүйн хөгжлийн тулгуур болсон үндэсний хэмжээний бүтээн байгуулалтыг тууштай хэрэгжүүлж байна.

Бөөрөлжүүт - Ирээдүйг асаана!